Toe ek ‘n kind was, het ons slegs één soort tamatie geken – vleistamaties uit ons eie tuin. Met byna geen rakleeftyd, is hierdie outydse tamatie soet, en oorvloedig aan geur. Tot vandag plant ek elke jaar tamaties tussen my struike, as skakel tot my jeug. As ons kinders siek was, het my ma ’n trooskossie gemaak van eiers, gestoom in ’n bedding van tamatiesmoor.
Tamatie-eiers
Braai ui in gelyke hoeveelhede botter en olyfolie, tot deursigtig. Sny nou volryp vleistamaties by, en smoor stadig tot gaar.
Maak dammetjies in die smoor met ’n houtlepel, en breek eiers daarin. Plaas nou ’n deksel op die pan, en stoom todat die eiers gaar is.
Bedien op die witste roosterbrood, en te hel met gesondheid.
