Framboosbessies

Gisteraand het ons brood gebreek. Reeds vroegmiddag het ek ’n skaapblad in die oond gesteek, met prei, suurlemoen en seldery, en klein aartappels later ingevoeg, by daardie intense sous wat net ’n blad kan uitsweet. Die enigste bykos was plomp aspersies, met gemarineerde avokado as slaai.

Suurlemoen

Lank moes ek dink aan ’n ligte nagereg wat deur hierdie ryk smake kon sny, want ’n malva-poeding sou dodelik wees na hierdie gekonsentreerde skottels. Ek blaai deur my ma se resepte, en nét daar tref ek clafoutis, ’n eenvoudige nagereg wat ek laas in Swede geëet het, gemaak met wolkbessies. Probeer dit eenmaal: clafoutis het die perfekte balans tussen soet en suur, en met die tekstuur van Crêpes Suzette.

Gemarineerde avokado slaai

Bestanddele:

• 3 koppies framboosbessies
• halfkoppie suiker
• opsioneel: fyngemaakte laventel-blomme – ek het Bourbon-vanilje gebruik
• halfkoppie melk
• halfkoppie créme fraiche
• 4 groot eiers
• knypie sout
• 1/3 koppie koekmeel

Bourbon-vanilje

Metode:

Stel oond op 190C
Strooi ’n eetlepel suiker oor die framboosbessies, en laat rus teen kamertemperatuur.
Meng, deeglik, die suiker, melk, crème fraiche, eiers, sout, dan laastens, klop die meel in die beslag. Pak die framboos in ’n enkellaag op die bodem van ’n gesmeerde oondpan en giet die beslag versigtig daaroor. Bak vir ongeveer 35 minute, of tot die bolaag goudbruin word. Laat die poeding afkoel vir ongeveer 15 minute, en bedien met crème fraische, vla of roomys. Ek het dit met vla bedien, met komkommerkruid-blommetjies versier.

Clafoutis